Əsas səhifə > Müsahibələr, Əli Kərimli > “Artıq ata-oğul, nəvə hakimiyyəti dövrü bitib”

“Artıq ata-oğul, nəvə hakimiyyəti dövrü bitib”

“Mənim özümə və yaxınlarıma təzyiqlər ictmaiyyətin bildiyindən xeyli çoxdur”

“Azadlıq” radiosuna müsahibəm “Azadlıq” qəzetinin təqdimatında

AXCP sədri Əli Kərimli “Azadlıq” radiosunun “Işdən sonra” proqramının qonağı olub. Partiya sədri qaynı Elnur Seyidovun həbsi, ölkədəki ictimai-siyasi vəziyyət, Ictimai Palatanın 8 aprel mitinqi və bu kimi məsələlərlə bağlı həm radionun, həm də canlı bağlantıya qoşulan dinləyicilərin suallarını cavablandırıb.

“Elnuru mənim yaxın qohumum olduğu üçün cəzalandırırlar”

– Ilk olaraq qaynınız Elnur Seyidovun həbsi ilə bağlı fikirlərinizi bilmək istərdik. Bildiyimizə görə, Elnur hazırda MTN-də saxlanılır. Bu həbsi necə dəyərləndirirsiniz və onun saxlanma şəraiti ilə bağlı əlavə nə bilgi verə bilərsiniz?
– Əvvəla, bu qeyri-qanuni həbsdir. Elnur heç bir cinayət törətməyib. Artıq iş üzrə ilkin məhkəmə baxışı olub. Vəkillər həbsin əsassızlığını sübut etsələr də, məhkəmə sifariş əsasında üç aylıq həbs-qətimkan tədbiri seçib. Elnur özü də məhkəmədə bildirib ki, o heç bir cinayət törətməyib, sadəcə olaraq onu mənim yaxın qohumum olduğu üçün cəzalandırırlar. Elnura qarşı iddia olunan cinayət iqtisadi cinayətdir. Ittihamın mahiyyəti odur ki, guya, müştərilərə xidmət zamanı lazım olduğundan artıq pul alıb və bankın rəhbərliyinə göndərib. Sual yaranır ki, bu işə Milli Təhlükəsizlik Nazirliyinin nə aidiyyəti var? Niyə Elnur MTN təcridxanasında saxlanılmalıdır? Deməli, bu, siyasi xarakterli işdir. Ikincisi, o, filial müdirini müavinidir, birbaşa məsul şəxs olmadığı bəllidir. Özü də xəstədir. Kifayət qədər ciddi xəstəlikdən illərdir müalicə olunur. Bir neçə dəfə xaricdə müalicə olunub. Axırıncı dəfə Türkiyədəki klinakada verilən həkim rəyi artıq istintaqa təqdim olunub.  Həyatına təhlükə olan adam haqqında heç bir əsas olmadan dərhal həbs-qətimkan tədbiri seçib, hay-küylü şəkildə MTN təcridxanasında saxlamaq təzyiq vasitəsidir. Bu, birinci dəfə deyil. Son illərdə mənə və Xalq Cəbhəsinin fəallarına qarşı bu təzyiqlər mütəmadi davam edib. Bütün dövrlərdə ən çox həbslər elə AXCP funksionerlərinə qarşı olub. Az qala, partiyanın Rəyasət Heyətinin yarıya qədəri keçmiş siyasi məhbuslardır. Indi də bizim 8 siyasi məhbusumuz var. Şəxsən özümə qarşı da bu cür təzyiqlər birinci dəfə deyil. Işdən çıxarılan, inzibati həbs alan qohumlarımın sayı lap çoxdur. Bundan bir neçə il əvvəl əmim oğlu Inqilab Kərimov həbs olundu, bir neçə il siyasi məhbus həyatı yaşadı. Başqa yaxın qohumlarımdan hansının kiçik biznesi var idisə, hamısını əllərindən aldılar. Işləyənləri işdən çıxardılar. Elnur mənim yaxın qohumlarımın arasında yeganə adam idi ki, işləyirdi.

“Özünə demişdim ki, bu iş yaxşı qurtarmayacaq”

– Elə mən də bunu soruşmaq istəyirdim ki, nə yaxşı, bu vaxta qədər bu vəzifədə qala bilib?
– Bu mənim də diqqətimi cəlb edirdi. Özünə bir neçə dəfə demişdim ki, bu iş yaxşı qurtarmayacaq. Sən bir istisnasan. Bu rejim də istisnaları sevmir. Baxmayaraq ki, o heç vaxt siyasətlə məşğul olmayıb, 20 ildir peşəkar bank işçisidir, ixtisasca da hüquqşünasdır. Bankda işə hüquqşünas kimi başlayıb, pillə-pillə yüksəlib. Hətta bir müddət filial müdirliyinə qədər gedib çıxmışdı. 2005-ci ildə mənə qarşı kampaniya başlayanda onu işdən çıxartdılar. Iki il işsiz qaldı, sonra peşəkar olduğunu nəzərə alaraq yenidən dəvət etdilər. Amma aşağı bir vəzifəyə. Bu, onun peşəkar və siyasətdən tam uzaq olması ilə bağlı idi ki, bugünə qədər işləyə bilmişdi. Heç vaxt siyasətlə məşğul olmayan, bizim işlərdən məsafədə olan bir adamdır. Yeri gəlmişkən, bir neçə ay əvvəl onun özünü də xəbərdar etmişdilər ki, başında böyük bir təhlükə var. O da demişdi ki, mən siyasətçi deyiləm, siyasi işlə məşğul olmuram, Əli Kərimli də mənim sözümlə oturub-duran adam deyil. Məndən tələb edirsiniz ki? Bacımdan, bacım uşaqlarından, qohumlarımdan imtina edim? O zaman ona dedim ki, bank işindən uzaqlaş. Dedi, axı mən başqa iş bacarmıram, 20 ildir bu işlə məşğulam. Dedim, çıx get başqa ölkədə yaşa. Mən bilirəm ki, yaxın qohumlarım üçün bu ölkədə çox ciddi təhlükələr var. Açığı, onun səhhətindən narahat idim. Səhhətində ciddi problemlər var. Ona görə baş verənlər bizim üçün də, ailəsi üçün də çox ağırdır.

– Başqa elə bir qohumunuz da varmı ki, ona da tövsiyə verəsiniz?
– Bizim kifayət qədər böyük ailəmiz var. Həm özümün, həm həyat yoldaşımın ailəsini nəzərdə tuturam. Işləyənlər demək olar ki müəllimlər qalıb. Başqa kim nə itirə bilərsə, itirib. Bilirsiniz, mən çox qəribə hadisələrlə rastlaşmışam. Mənim əmim oğlunlarından birinin Xutor qəsəbəsində özəl taxta sexi var idi. O qəsəbə tamamilə plansız tikilmiş bir yerdir. Bakı Şəhər Icra Hakimiyyəti o sexin sökülməsi haqqında sərəncam vermişdi ki, Xutorun arxitekturasını pozur. Başqa bir əmim oğlunun avtomobil təmiri sexi var idi, onun da aqibəti eyni oldu. Başqa yerlərdə, müxtəlif nazirliklərdə işləyən qohumlar var idi ki, hamısını zamanında işdən çıxarıblar. Ona görə deyirdim ki, bu axırıncı idi.

“Sanki bu kraldır, mən də ona qarşı qiyam qaldırmış bir cəngavər”

– Bütün bunlara görə qohumlar sizi qınamırlar ki?
– Qınamırlar. Birincisi, hətta siyasətlə məşğul olmasalar belə, onlar da Azərbaycanda yaşayırlar. Siyasətdə olmayanı da başa düşür ki, mən qeyri-qanuni heç bir iş görmürəm. Mən onu başa düşməyə çətinlik çəkirəm ki, niyə bu hökumət, Ilham Əliyev başda olmaqla müxalifətlə, konkret mənimlə düşmənçilik edir? Mən konstitusion hüquqlarımdan istifadə edib dinc, sivil qaydada müxalifətçilik edirəm. Mənimlə niyə düşmənçilik aparılır? Sanki bu kraldır, mən də ona qarşı qiyam qaldırmış bir cəngavər. Bu mənimlə belə davranır, açıq-aşkar düşmənçilik edir. Bu 21-ci əsrdir, biz Avropa Şurasının üzvüyük. Bu zorakılığa yer olmamalıdır. Siyasətə aidiyyəti olmayan adamlara niyə repressiya edirsən axı? Mənə sözün var, mən hazır. Mən hər cür məhrumiyyəti göz önünə  almış adamam. Amma heç bir təqsiri olmayan, siyasətə aidiyyəti olmayan, siyasi iddiası və marağı olmayan sadə vətəndaşları yalnız Əli Kərimli ilə qohum olduğuna görə cəzalandırmaq nə azərbaycanlılığa, nə müsəlmanlığa, nə insanlığa yaraşan hərəkətdir. Bu, çağdan geri qalmış  zehniyyətdən xəbər verən hərəkətdir. Azərbaycan hakimiyyəti öz səhvindən imtina etməlidir. Bu çanaq öz başlarında çatlaya bilər.

– Belə bir fikir var ki, bütün bunları prezident yox, ətrafı edir. Bəlkə prezidentin bundan heç xəbəri yoxdur. Ola bilərmi?
– Dünəndən bəri bu, bütün kütləvi informasiya vasitələrinin bir nömrəli xəbəridir. Üstəlik, bir sıra beynəlxalq təşkilatlar, diplomatik korpusun nümayəndələri artıq hökumətlə əlaqəyə girib bu məsələ ilə bağlı izahat istəyirlər. Əgər bütün bunlardan sonra onun xəbəri yoxdursa, o zaman niyə işləyir bu vəzifədə?

“Buna üz lazımdır ki, dünyada korrupsiya çempionu olanlar…”

– Elnur Seyidov bu həbsi siyasi sifariş hesab edir. Məhkəmə prosesində özünü təqsirli saymadığını deyib. Əli bəy, bu tip işlərin əksəriyyətində siyasi sifariş sözü səsləndirilir. Burada söhbət, bank əməliyyatından gedir, konkret rəqəmlərlə məsələni həll etmək olmazmı?
– Elnur xaraktercə qanunu pozmağa meyilli adam deyil. Təsəvvür edək ki, qanunu pozmaq, qanunsuz yolla nəyisə mənimsəmək onun könlündən keçib. Amma o yaxşı bilirdi ki, ciddi nəzarətdədir. Bilirdi ki, məhz mənim qaynım olduğuna görə bir dəfə siyasi mülahizələrlə işdən çıxarılıb, işsiz qalıb. Bilirdi ki, onu hədələyirlər. Ona görə də heç bir qanunsuz addım atmırdı. Mən bəri başdan deyirəm və arxayınam ki, onun istintaqın gedişində də heç bir qanunsuzluğu üzə çıxmayacaq. Bu adam bankda sahibkar yox, rəhbər yox, peşəkardır. Hətta təsəvvür etsək ki, istintaqın ittiham etdiyi kimi Elnur həqiqətən də həmin rüsumları nəzərdə tutulduğundan artıq toplayıb və rəhbərliyə göndərib. Yaxşı, ölkə bütünlükdə bu piramidanın üzərində qurulmayıb? Məktəb müəllimlərini məcbur edirlər, hərəsi üç-beş manat Maarif şöbəsinə versin, həkimləri məcbur edirlər pul yığıb baş həkimə versinlər. Kimi məcbur edib bu üsulla işlətmirlər? Buna üz lazımdır ki, dünyada korrupsiya çempionu olanlar, aktivləri 1,4 milyard qiymətləndirilən “Kapital bank”ı bir-iki il bundan əvvəl 3-4 milyona – su qiymətinə özəlləşdirənlər indi gəlib bu piramidanın vintcikləri ilə mübarizə aparırlar ki, bunlar qanunu pozurlar. Halbuki belə bir şey yoxdur. Lap tutalım var. Bu nə deməkdir? Yüz minlərlə məmurun arasında gəlib Əli Kərimlinin qaynını tapırsan ki, sən bu korrupsiya mexanizmində işləmisən.
Bu korrupsiya mexanizmini quran sənsən, onun vintləri də yüzminlərlə adam.

“Hansılar barədə susmaq mümkündürsə, danışmıram”

– Sizcə, niyə elə edirlər?
– Mənə təzyiq etmək üçün. Siz mənə qarşı münasibəti görmürsüz? Başqa ikinci adam varmı 7 ildir pasportu olmasın? Hansı mülkiyyətçiylə razılaşıramsa ki, obyektini partiya üçün icarəyə götürüm, iki gündən sonra ya Milli Təhlükəsizlik Nazirliyinin, ya da polis əməkdaşları onu  çağırıb elə hədələyirlər, xahiş edir ki, bir daha biz tərəfə baxma. Biz bu barədə hər gün danışmırıq. Mənim özümə, yaxınlarıma təzyiqlər ictmaiyyətin bildiyindən xeyli çoxdur. Hansılar barədə susmaq mümkündürsə, danışmıram. Belə hallar həddən artıq çoxdur.

– Bəs bunların təsiri necə olur?
– Belə qohumların həbsi ailədə diskomfort yaradır. Üç azyaşlı uşağı var. Ailə üzvlərinin təbii ki, hamısı bu əzabı çəkməli olur. Daha çox həyatından narahat oluruq. Bir daha demək istəyirəm ki, Elnur kifayət qədər ağır xəstəlikdən müalicə olunur, onun həyatına ciddi təhlükə var. Mən müvafiq sənədləri istintaqa da çatdırmışam. Onları dəqiqləşdirə bilərlər. Bunu ona görə deyirəm ki, Elnurun həyatına ola biləcək hər hansı təhlükəyə görə məsuliyyət daşıyırlar. O elə bir xəstəlikdən əziyyət çəkir ki, hər an şikəst ola, həyatına təhlükə yarana bilər. Stress onun xəstəliyini çox ciddi şəkildə gərginləşdirə bilər. Ona görə hökuməti xəbərdar edirəm ki, bu barədə fikirləşsinlər.

“Bakı Şəhər İcra Hakimiyyətinin ixtiyarı yoxdur bizə desin ki…”

Cavanşir (dinləyici): Hörmətli Əli bəy, sizcə, müxalifət niyə zəifdir, 2003-cü ildən bu yana ancaq seçki zamanı birləşirsiniz və dağılışırsınız.
– Hörmətli Cavanşir bəy, bu bir az köhnəlmiş sualdır. Şükürlər olsun ki, birləşmişik amma dağılmamışıq. Indi də seçki zamanı deyil. Artıq bu arqument köhnəlib. Indi müxalifətin əksər hissəsi, Ictimai Palatadadır, bir yerdəyik. Seçki yaxın olmasa da, hakimiyyətə çox ciddi bir təhdid yarada bilirik. Bizdən narahatdılar ki, bu repressiyaları edirlər də. Əgər biz çox zəif olsaq, inanın ki, nə bizim özümüzlə, nə də qohumlarımızla belə işlər olar. Hakimiyyət müxalifəti özünə təhlükə gördüyünə görə müxalifətə qarşı bu cür qeyri-sivil üsullardan istifadə edir.

“Azadlıq”: Əli bəy, mitinq barədə qərar verildi, iki yer – “Təbriz” və “Nərimanov” kinoteatrlarının qarşısı   istənildi. Niyə məhz bu yerlər?
– Biz əslində o yeri də kompromis olaraq təklif etmişik.  “Nərimanov” kinoteatrının qarşısı bizim istədiyimiz yerdir. Şəhərin birmənalı mərkəzi olmasa da, yaxşı yerdir. Biri isə hökumətin mitinqlərin keçirilməsi üçün özünün ayırdığı yerdir. Amma bizim kompromisimiz bununla da bitmir. Biz demişik ki, hökumətin istənilən təklifini ciddi müzakirə edəcəyik. Bilirsiz niyə bu cür kompromisə meylli mövqe tutmuşuq? Bu, bizim sərbəst toplaşmaq azadlığımızın məhdudlaşması ilə barışmaq deyil. Biz öz hüququmuzu yaxşı bilirik. Bilirik ki, Bakı Şəhər Icra Hakimiyyətinin ümumiyyətlə ixtiyarı yoxdur bizə desin ki, hara get, hara getmə. Konkret qanunda qadağan olunmuş bir-iki yer var. O yerdən başqa şəhərin istənilən yerində biz mitinqimizi keçirə bilərik. Amma hökumət qanunu pozur. Biz də reallığı nəzərə alaraq və daha çox sayda insanın kütləvi aksiyalarda iştirak edə bilməsi üçün razılaşdırılmış aksiya keçirmək istəyirik. Ona görə də biz istənilən təklifi müzakirə edəcəyik.

“Xalqın hakim olacağı sistemi nəhayət bərqərar etməliyik”

“Azadlıq”: Mitinqə hazırlıq işləri nə yerdədir?
– Hazırlıq gedir. Açığı, indi bizim əsas qayğımız odur ki, başlanan razılaşdırılmış aksiyalar yalnız müxalifət funksionerlərinin iştirak edəcəyi tədbir olmasın. Ölkədə həddən artıq problemlər var. Hər gün kütləvi informasiya vasitələri bir təbəqənin problemlərindən bəhs edir. Bir müddət evləri sökülənlər fəal olurlar, onlar ayrılıqda bir nəticə əldə edə bilmirlər. Bir müddət regionlardakı narazılıqlar gündəmə gəlir. Sonra nəqliyyat işçilərinin, taksi sürücülərinin narazılığı gündəmə gəlir. Nəqliyyat Nazirliyinin qolzorlularından bəhs olunur. Bu yaxınlarda da gördünüz ki, sürücülərlə necə rəftar etmişdilər. Bu narazılıqlar mütəmadi davam edir. Yol narazılığı, qaz, işıq, işsizlik, təhsil, sosial xidmətlərdən narazılıq və s. Hamı çalışır ki, ayrı-ayrılıqda öz problemini həll etsin. Biz vətəndaşlarımıza izah etmək istəyirik ki, hər biriniz ayrı-ayrılıqda öz problemlərinizi həll edə bilməzsiniz. Çünki bu  ölkədə vətəndaşla hesablaşmayan, vətəndaş tərəfindən seçilməyən bir hakimiyyət var. Deməli, sistemi dəyişmək lazımdır. Xalq tərəfindən seçilmiş hökumətə keçmək lazımdır. Əmanətlərin guya qaytarılması ilə bağlı prezident fərmanı oldu. Niyə guya deyirəm. Çünki qoyulmuş bütün əmanətlərin 5-7 faizinin geri qaytarılmasından söhbət gedir. Dövlət də öz vətəndaşına bu qədər etibarsız, soyğunçu, acımasız olar? Bu ölkədə hər şeyə pul var. Bir yolu bir ildə üç dəfə söküb yenidən çəkirlər. Yolların qırağına bahalı – bir metri 500 manatdan rəsmiləşdirilən bordürlər qoyurlar, mərmərlər düzürlər. Hər əkdikləri ağacın dibinə işıq çəkirlər. Bakı Şəhər Icra Hakimiyyətinin yarım illik elektrik ödəməsi 400 milyon manatdır. Bunun hamısına pul var, yeraltı keçidlərə mərmər döşəməyə pul var. Hər qəsəbədə, kənddə Heydər Əliyev üçün abidə qoymağa, muzey yaratmağa pul var. Amma vətəndaşın evi söküləndə pul yoxdur. Vətəndaşın əmanətini qaytarmaq lazım olanda əlli min oyundan çıxırlar ki, onun 5-7 faizini qaytarsınlar. Nəyə görə? Çünki bu ölkədə vətəndaş axırıncı sırada dayanır. 8 aprel ərəfəsi bütün vətəndaşlara bu mesajı çatdırmaq istəyirik ki, problemlərinizlə ayrı-ayrılıqda məşğul olmayın. Bütün sivil ölkələrdə olduğu kimi, hamılıqla toplaşaq, ölkəmizdə ciddi dəyişiklik edək. Bəzən adamları aldadırlar. Bu dəyişikliklər kimlərinsə hakimiyyətə gəlməsi, məxsusi olaraq kiminsə prezident olması üçün deyil. Sizin özünüzün hakimiyyətə əl qoymağınızdan ötrüdür. Qoy, xalq hakim olsun, kimi istəsə seçsin. Bu sistemi nəhayət bərqərar etməliyik.
Biz o insanların varisləriyik ki, müsəlman aləmində ilk demokratik cümhuriyyət quranda dünyada yalnız 25 xalq demokratik dövlət qura bilmişdi. Indi üzərindən 94 il keçib. 150-dən artıq ölkədə demokratiya az-çox bərqərar olub. 20-30 avtoritar rejim qalıb ki, Azərbaycan da onun sırasındadır. Ən hüquqsuz xalqlardan biriyik. Bu, bizim milli təəssüb məsələmizə çevrilməlidir. Özümüzə necə rəva görə bilərik ki, sağımız, solumuz – hər yer demokratiyaya qovuşub. Bütün xalqlar hökumətlərini onlarla hesablaşmağa məcbur edib. Biz isə hələ hüquqsuzuq. Hələ də bizimlə hesablaşmırlar. Ona görə 8 aprelə fürsət kimi baxırıq. Razılaşdırılmış mitinq keçirək. Meydan hara olmağından asılı olmayaraq bütün insanlar toplanıb gəlsinlər. Hamı öz etirazını bildirsin və biz bu ölkədə dəyişikliklərə böyük bir təkan verək.

– Mitinqlə bağlı təbliğat aparmanız üçün bəzi mətbuat orqanlarını saymasaq, çox imkanınız yoxdur. Aksiyanın effektli alınması üçün təbliğat işini necə quracaqsınız?
– Informasiya imkanlarımız məhduddur. Bu, bizim istəyimizdən asılı və ya bacarığımızla bağlı məsələ deyil. Hökumət elə şərait yaradıb ki, televiziyalar real müxalifətin üzünə tamamən qapadılıb. “Azadlıq” istisna olmala, radiolarla da bağlı vəziyyət eynidir. “Azadlıq”ın da FM imkanı yoxdur. Qalır internet və iki qəzetin imkanları. Daha çox internetin imkanlarından istifadə etmək haqqında düşünürük. Bugünlərdə partiyamızın, rayon təşkilatlarının çox operativ, dinamik toplantıları keçirilir. Aprelin 1-də 6 rayonda Ictimai Palatanın rayon təşkilatlarının böyük konfransları keçiriləcək. Yüzlərlə-minlərlə insan bu təbliğata cəlb olunur. O cümlədən mitinqə çağırışla bağlı vərəqələr paylanacaq, müxtəlif yerlərdə şüarlar yazılacaq. Müxtəlif vasitələrlə məqsədlərimizi insanlara çatdıra biləcəyik. Əlbəttə ki, milyonlara çatdıra bilməyəcəyik. Amma yüz minlərə çatdırmağı düşünürük. Meydana topladığımız insanların hər biri isə sonradan təbliğatçıya çevrilə bilər.

“Rauf Həbibov kimlərin hamısı vəzifədədir”

“Azadlıq”: Sizcə, mitinqdə işıqları söndürməzlər ki?
– Yəqin ki, söndürəcəklər. Ona görə özümüzlə əlavə mühərrik götürəcəyik. Müxalifətin bütün mitinqlərində bu problemi yaşayırıq. Bu səbəbdən həmişə ehtiyat mühərrikimiz və mikrofonumuz olur.

Rəsul (Quba, dinləyəci): Əli bəy, deyəsən Qubanın keçmiş icra başçısı Rauf Həbibova vəzifə verilib. Bu barədə məlumatınız yoxdur ki?
– Bu barədə konkret məlumatım yoxdur. Amma bu ölkədə Rauf Həbibova vəzifə verilməsi də qeyri-adi deyil. Axı, Rauf Həbibov kimlərin hamısı vəzifədədir. Bir o getməklə bu ölkənin problemləri düzəlmir ki. Əksər rayonlara rəhbərlik edənlər elə Rauf Həbibov kimi düşünən və danışan insanlardır.

Dinləyici: Əli bəy, bu rejimi kim yaradıb?
– Bu rejimi əlbəttə ki, Heydər Əliyev yaradıb. Sonra da oğluna mülk kimi, əmlak kimi qoyub o dünyaya gedib.
“Mənə qarşı təzyiqlərin artması göstərir ki, özlərini rahat hiss etmirlər”

Dinləyici: Dövlətin təhlükəsizlik orqanlarının işi ancaq müxalifət partiyalarının rəhbərlərini şərləməkdən ibarətdir. Xalq baş verənlərə müşahidəçi qalana qədər bu da davam edəcək.
– Tamamilə doğrudur. Amma mən o fikirdəyəm ki, böyük, kütləvi etirazlar yetişir. Mənə qarşı təzyiqlərin artması göstərir ki, özlərini rahat hiss etmirlər. Özlərini rahat hiss etsələr, niyə əlavə skandal yaradırlar. Bilirlər ki, hər necə olsa, “Eurovision”a görə iki ay ərzində dünyanın Azərbaycana diqqəti çox olacaq. Müxalifət liderinin yaxın qohumuna qarşı repressiyalar da yəqin ki, dünyanın diqqətini cəlb edəcək. Niyə bu skandala getsinlər? Çünki başlarını itiriblər. Onsuz da bu kimi təzyiqlər mənim fəaliyyətimə təsir edə bilməz. Milli təhlükəsizlik əməkdaşları ancaq partiya liderləri ilə məşğul olmurlar. Onlar jurnalistləri də diqqətdə saxlayırlar. Onlara da “qayğıları” hiss olunur.

“Azərbaycan onsuz da dəyişəcək”

“Azadlıq”: Nə mənada?
– Bu təxribatlar həm müxalifət liderlərinə, həm jurnalistlərə qarşı yönəlib. Elə bugünlərdə sizin radionun aparıcısı – Azərbaycanın ən cəsarətli və peşəkar araşdırmacı jurnalistlərindən biri, bəlkə də birincisi, Xədicə xanıma qarşı bu ləyaqətsiz kampaniya nə idi bəs? Kim eləmişdi onu? Hansısa dövlət rəsmiləri çıxıb riyakarcasına bir-iki bəyanat verəcəklər, Azərbaycan ictimaiyyəti də inanacaq ki, bunların xəbəri yoxdur. Hər kəs bilir ki, bu çirkin kampaniya birbaşa hakimiyyətin göstərişi ilə aparıldı. Düzdür, bumeranq effekti verdi, hakimiyyət özü bu kampaniyadan ziyanla çıxdı.
Mən inanıram ki, qohumumum həbsi də əks-reaksiya verəcək. Bu işdən peşman çıxacaqlar. Ağılsız addımlar atmaq hökuməti yaxşı yerə aparmır. Barışmaq lazımdır. Dünya dəyişib, artıq ata-oğul, nəvə hakimiyyəti dövrü bitib. Indi orta əsrlər deyil. Neyləyək ki, bu dünyaya bir az gec gəlmisiniz. Görünür, bunlar orta əsrlərdə dünyaya gəlməli idilər. Azərbaycan onsuz da dəyişəcək. Zorla tarixini təkərini saxlamaq olmaz. Bəlkə bir-iki il sallanıb bu təkərləri saxlaya bilərsiniz, amma daha artıq yox. Ona görə də qanunsuz əməlləri dayandırmaq lazımdır. Azərbaycan xalqını kütləvi çıxışlara təhrik edirlər. Əgər bu kurs davam etsə, Azərbaycan müxalifətinin, dünya birliyinin təklif etdiyi ardıcıl islahat başlamasa, addım-addım da olsa, bu ölkə dəyişməsə, günün birində bu ölkənin Quba kimi ayağa qalxacağını gözləmək lazımdır. Azərbaycan hakimiyyəti buna qətiyyən təəccüb etməməlidir.

Kateqoriyalar: Müsahibələr, Əli Kərimli
  1. Hələlik heç bir şərh yoxdur
  1. No trackbacks yet.

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: