İlham Əliyev izahat versin

Vaşinqton Post qəzeti  Əliyevləri tam ifşa etdi. Sadə azərbaycanlılar iqtisadi böhranla çarpışırkən, Azərbaycan əhalisinin  2 milyona qədəri ayda 70-80 manatla dolanmağın sirlərinə yiyələndiyi vaxtlarda  ailəyə yaxın işbazlar da İlham Əliyevin  12 yaşlı oğlunun adına 44 milyon dollarlıq əmlak almaqla məşğul imişlər.

Vaşinqton  Postun əməkdaşı həmin əmlakın yerləşdiyi  Dubayın milyonçular məhəlləsinin  şəkillərini də yayimlayib. Araşdırma xarakterli məqalədə ailənin başqa korrupsiya  əməllərindən də bəhs edilir.

Maraqlıdır, nə edəcəklər? Bu yazını yazan Elmar deyil ki, ölürtdürələr. Aqil Xəlil deyil ki, bıçaqladıb, sonra da mənəvi terrora məruz qoyasan. Qənimət Zahid, Eynulla Fətullayev, Mirzə Sakit, Emin Milli, Adnan Hacızadə deyil ki, şərləyib həbs etdirəsən. Bəli, cənablar, korrupsiyanı, talanı, oğurluğu gizlətmək mümkün deyil. Siz burada 5-7 min tirajı olan qəzetlərdə ifşa olunacağınızdan  ehtiyatlanıb mətbuata divan tutdunuz, indi isə milyonlarla tirajı olan, dünyanın ən məşhur qəzetlərindən biri sizi ifşa etdi.

İqtisadi böhranın təsiri açıq etiraf olunmasa da, son illərdə hökumət xalqa yönəlik bir çox xərclərdən “qənaət” edir. 2009- cu ilin büdcə xərclərindən 15% kəsdilər. 2010-cu ildə də büdcə xərclərini 17% azaldıblar. Bu arada pensiya yaşını yuxarı qaldırmaqla, 10 000-lərlə iş yerini ixtisar etməklə, ən imkansızlar üçün nəzərdə tutulan sosial müavinətləri belə bir müddət verməməklə  də hökumət xalqdan xeyli “qənaət” etdi. Necə düşünürsünüz, bu “qənaətlərlə” Dubayda alınan 74 milyon dollarlıq əmlakın arasında bir əlaqə yoxdurmu?

Mənim şəxsən şübhəm yoxdur ki, bu məqalədə yazılanlar korrupsiya aysberqinin yalnız görünən kiçik bir hissəsidir.  İlham Əliyev yazılanlarla razılaşmırsa, Vaşinqton Postu məhkəməyə versin. Baxaq görək Azərbaycan məmurlarının nəzarət etmədiyi müstəqil məhkəmədə korrupsioner olmadığını sübut edib, yazılanları təkzib etdirə biləcəkmi? Yox, əgər bunu etməyəcəksə istefa versin! Üzərində təkzib olunmamış, belə ağır ittihamlarla dövləti təmsil etməzlər.